Dek Itiak Indak Tasudu, Dek Ayam Indak Tacotok

Dek Itiak Indak Tasudu, Dek Ayam Indak Tacotok

Oleh: Eka Meigalia*

Itiak jo ayam iolah binatang nan masuak ka golongan unggeh. Dalam iduik manusi, unggeh nan duo ko banyak diambiak hasianyo baiak itu dagiangnyo, taluanyo, baitu juo jo bulunyo. Karano bamanpaaik tadi itu lah mangkonyo banyak nan manjadian itiak jo ayam ko untuak ditaranakkan.

Karano dakek jo iduik sahari-harinyo urang Minang, ayam jo itiak ko jadi paratian bana sagalo karajonyo. Karanonyo acok basobok dalam pepatah Minang kato ayam atau itiak ko disabuik sarupo pado pepatah nan ka kito kaji kini ko, “Dek itiak indak tasudu, dek ayam indak tacotok”.

Itiak jo ayam sarupo lah dijalehan saketek di ateh, iolah binatang nan tamasuak golongan unggeh. Itiak jo ayam ko dari ciri fisiknyo ampia samo, yaitu basayok, bakaki duo, ado cotok atau muncuangnyo, sarato babulu. Ayam jo itiak sacaro labiah khusus ado pambedanyo. Di antaro pambedanyo iolah ayam labiah tinggi karano kakinyo labiah panjang sarato tagak. Iko baguno untuak ayam karano ayam banyak maabihan wakatu di darek mancari makan sambia mangakeh. Samantaro kaki itiak labiah pendek dan ado selaput antaro jarinyo nan baguno untuak baranang. Dari bantuak cotoknyo babeda pulo antaro ayam jo itiak ko. Ayam cotoknyo labiah pendek, taba, sarato runciang karano inyo makan bijo atau caciang. Sadangkan cotok itiak labiah panjang, tipih, leba sahinggo hampia tabantuak suduik, sarato di ujuangnyo bagarigi pulo. Bantuak cotok itiak ko baguno karano inyo mancari makan di lunau atau aia sahinggo paralu manyariang aia atau lunau tadi untuak mandapekan makanan.

Karano bantuak cotok ayam jo itiak nan babeda tu, caro makan ayam jo itiak manjadi balain pulo. Dalam bahaso Minang dibedaan pulo manyabuiknyo. Itiak makan mancotok. Kato manyudu aratinyo iolah ‘mamatuak jo sudu’. Sudu iolah namo untuak muncuang itiak atau angso. Tasudu dalam pepatah di ateh mukasuiknyo ‘dapek disudu’. Tapi karano sabalum ado kato tasudu ado kato indak, mako pepatah tu manyatoan baso indak dapek disudu. Yang manyudu di siko iolah itiak. Saharusnyo jikok tapek, mako makanan tu dapek disudu dek itiak. Jikok ndak tasudu, aratinyo makanan tu ndak tapek, bisa jadi karano gadang, babijo, sarato kariang.

Untuak caro makan ayam disabuik jo kato cotok, aratinyo ‘maambiak makanan jo cotok (ayam)’. Kato tacotok dalam pepatah di ateh mukasuiknyo iolah ‘dapek dimakan jo caro mancotoknyo’. Karano ado kato indak sabalum kato tacotok, mako mukasuiknyo samo jo nan di itiak tadi, indak dapek dimakan jo caro mancotok. Biaso kalau makanan tu bantuaknyo caia, ayam ndak bisa mamakannyo.

Sacaro nan tasurek, pepatah di ateh manyatoan baso ado makanan nan dek itiak indak tasudu, dek ayam indak tacotok. Aratinyo makanan ko baiak ayam baiak itiak, kaduonyo samo-samo ndak dapek mamakannyo. Padohal sacaro teorinyo, jikok caia, mako itiak dapek mamakannyo, sadangkan jikok kareh kariang sarupo bijo, ayam dapek mamakannyo. Apo nan tasirek dari pepatah tu? Barang atau hal nan dicuboan kian ka mari tapi indak bisa masuak, tantu aratinyo barang atau hal iko balain dari nan biaso. Balain ko bukan baarati rancak, tapi iko aratinyo indak rancak. Itu didapek dari mukasuik kato tamakan. Hal-hal nan dapek dimakan tantu nan elok-elok. Jikok indak tamakan, aratinyo ndak elok. Apolai dek binatang sarupo ayam jo itiak, mereka sacaro instingnyo dapek mambedaan ma nan bisa dimakan jo ma nan dak bisa dimakan. Karano itu, papatah di ateh manyirekan hal-hal nan buruak, khususnyo sindiran untuak urang-urang nan bakato kasa. Kato nan kasa diumpamoan ka hal nan untuak itiak jo ayam se ndak tamakan, apolai dek manusia nan ado pikiran jo perasaan.

Manjago lisan ko juo adolah bagian dari perintah agamo nan tatuang Alquran dan Hadist. Salah satunyo dalam Hadist nan diriwayatkan dek Al Bukhari. Nabi Muhammad SAW bersabda baso keselamatan manusia tu bagantuang dari lisannyo. Barangsiapo nan baiman ka hari akhir, mako andaklah bakato baiak atau diam. Jadi diam labiah elok daripado banyak kecek tapi salah sarato manyakiti urang lain.

Ado 5 tuntunan bagi awak sahinggo tamasuak ka urang-urang nan manjago lisan ko. Partamu mangeceklah nan elok, kalau rasonyo ndak ka elok ancak diam. Kadang awak ndak sadar se kalau kato-kato nan dikaluaan ruponyo manyakiti urang. Jikok hal iko tajadi, capek-capeklah minta maaf.

Kaduo, jan sampai malawan urang mangecek katiko sadang emosi. Biasonyo katiko sadang emosi ko kato-kato nan kalua jadi kasa. Bahkan urang salah atau ndak salah acok jadi kanai kato kasa se dek kito sadang emosi. Mako katiko emosi, ancak manjauah dari urang.

Ketigo, kana-kana baso kato-kato nan lah dikaluaan itu ndak bisa dielo baliak. Mako apo nan kadikatoan ko harus dipikia-pikian bana. Itu bakaik jo nomor ampek baso kato nan manyakiti urang lain tu ibaraik luko dan akan mambakeh lamo. Karanonyo pikian bana apo nan kadisabuik.

Kalimo, acok-acok mangana salah diri surang sahinggo awak ndak talanjur mangata-ngatai urang. Kadang urang nan wak kata-katai tu ndak labiah buruak dari awak. Karanonyo, manjago lisan ko paralu bana dikarajoan. Itu salah satu akhlak umat muslim nan diajarkan Nabi Muhammad SAW.

*Dosen Sastra Minangkabau FIB Unand